Прызванне...
Што гэта такое?
Хто прызывае?
І куды?
Чаму душы няма спакою
І дзень, і ноч — усе гады?
Прызванне —
Свята і каранне,
Напруга ў працы, трубаў медзь.
Адным прызванне —
Мець бы званні,
Другім адно — прызванне мець.
Хоць і адчуў прызванне нават,
Прызвання мала аднаго.
Прызванне —
Значыцца свой талент
Аддаць яму й сябе ўсяго.
І гэта мала!
Без ваганняў
Ахвяраваць яму свой лёс.
Захоўваць у душы прызванне,
Нібыта першае каханне,
Якое праз жыццё пранёс.