Што ёсць жыццё? І што ёсць мы ў жыцці?
І што ёсць ісціна ў мільярдаў лёсаў?
Як шлях знайсці ў жыцці? І як прайсці
Ад «А» да «Я» без хібаў, перакосаў?
На «што ёсць што?», адказ —
пад пальцам ртуць.
Адказаў шмат, пытанняў значна болей.
Яны ў сабе разгубленасць нясуць
І вастрыню расчараванай болі.
Жыццё пражыў, нібы змарыў каня —
Жар-птушку не дагнаў, не ўцёк ад смерці.
О жах! Няўжо жыццё — ёсць мітусня?
А ісціна — ёсць Бог?..
Не ў кожным сэрцы.