Жыццё (стварыў так «Рэжысёр») —
Спектакль аднаактны.
І вось фінал: акцёр — памёр...
Але, пакуль гучыць — «Матор!»,
Фінал — міраж абстрактны.
Ёсць «порах» — і жывы жыве,
Хоць і ў ЯЕ на вудзе.
І тушыць думку ў галаве:
«А-а, смерць?.. Калі йна будзе?..»
Хінецца думка ад бяды,
«Жыццё!» — гучыць звышважка.
Што колісь знікнеш назаўжды —
Ўявіць такое цяжка.
І гэты аптымізм-бальзам
Саломінкай хімерыць...
He дадзена другога нам,
Як у нязбыўнасць верыць.