У творчы свет
з’яўляюся я з чым?
Як я цябе ўслаўляю,
родны краю?
Я — самаед,
не бацька я — айчым
Для твораў для сваіх,
якія маю.
Тытанаў творчых —
вунь якая раць!
Здзяйсненняў гучных —
вунь якая слава!
Ці маю права
ў рукі пэндзаль браць?
Слугою слова быць
ці маю права?
Сусвет вялікі творчы,
мне прабач,
Я — ў роспачы,
мой боль душы — не жарты.
Хоць ты мне падкажы
глядач, чытач,
Што мне далей рабіць?
Чаго я варты?