Як шмат «сяброў» у тых,
хто на пасадзе,
Угодніцкіх, услужлівых, прыгнутых.
Ці карагодзяць, ці, як на парадзе,
Стаяць на выцяжку
ў прыёмных, па закутах.
— Як скажаце... Так-так...
Заўсёды згодны...
Іх лексікон —
салодзенькі, без солі.
Каб хто калі з іх
«не» сказаў — ніводны,
Каб хтосьці разагнуўся з іх — ніколі.
Калі ж з пасады
злезе той чыноўнік,
«Сябры» усё па-новаму узважаць —
Ці пры сустрэчы ткнуць:
«А-а, беспрацоўнік...»
Альбо дэманстратыўна
не заўважаць.