Што лепей —
Слухаць ці распавядаць?
Тут два пытанні ёсць:
Каго?
Каму?
Што лепей —
Атрымаць альбо аддаць?
Карысці больш з чаго
Жыццю майму?
З маленства
Многа чуе кожны з нас
Праз калыханку,
Ад гадоў сівых.
Да нас імкнуцца
праз глыбінны час
І мудрасць продкаў,
і памылкі іх.
Не толькі важна слухаць
Але й чуць,
Як кожны час
І плача, і пяе.
З мінулага і будучыню ткуць,
Ўплятаючы
Сучаснасць у яе.
Таму люблю я слухаць
Мудрасць дзён,
Сучасных дзён
І тых, што адгулі.
І велічнага неба парасон,
Й шматвекавы,
Былінны сказ зямлі.
Люблю я слухаць...
А распавядаць?
Лягчэй мне ў творах,
спавядацца ім.
Сваю часцінку вопыту аддаць
Я проста абавязаны другім.