Жарт
Зацёртыя,
Занюханыя словы,
Ізбітыя,
Затоптаныя рыфмы.
Іх ужываць
Апошні час гатовыя
Паэты і бывалыя,
І новыя,
Як нежывое
Ужываюць грыфы.
А што рабіць,
Калі ўсё перапісана,
Калі ўсё неаднойчы
Пераказана?
На творчай ніве,
На Парнасе —
Лысіна,
Без музы верш,
Як човен Сценькі Разіна.
І маладым,
Сучаснасцю загушканым,
Падставы ёсць
Для скаргаў аблапошаных —
Было не цяжка
Пушкіну стаць Пушкіным
Сярод і слоў,
І вобразаў «няношаных».
Нялёгка вам,
Мае калегі, мучацца,
За класікаў не менш
Таленавітыя,
Эх, дзвесце год таму бы
Вам парупіцца,
Ў гісторыі
Былі б вы п’яна-сытыя...
Падняўся ціск,
Хоць укалі магнэзію —
Ўсё лепшае
Даўным-даўно расхоплена.
Запознена
Прыйшлі мы у паэзію —
Пайду лепш у кабак,
Нап’юся дóп’яна.