Не ешце мясное —
Разумнікі вучаць,
Мясное вас будзе
Нястраўнасцю мучаць.
Чума афрыканская
Тоіць пагрозы.
Гавядзіну —
Алюбавалі лейкозы.
У сале таксама —
І страхі, і жуды,
Яно вам заб’е,
Закаркуе сасуды
Кураціну —
Зноў ужываць небяспечна,
Там АШ-2-1 —
Нейкі грып невылечны.
Гародніна — гэта
Нітраты, нітрыты,
І хіміі поўны букет
Знакаміты.
А, можа б, нам
Рыбным меню адкупіцца?
Ды ў рыбе шмат фосфару —
Будзем свяціцца,
Як лямпачка тая,
Што свеціць у вочы —
І вы, і сям’я
Не заснеце ўсе ночы.
За што ні вазьміся —
Бацылы,
Мікробы,
Усё, што ядзім мы —
Хваробы,
Хваробы.
Мы плоцім грашыма
Й здароўем за гэта.
Дык што?
Нам хана?
Наша песенка спета?
Вось мы й дажыліся —
Ні стаць
І ні сесці.
А як жа нам жыці?
А што ж тады есці?