Праменіў небасхіл
блакітным вокам,
І сонейка пяшчоцілася —
Цуд!
Ды хмарнасць пачарнелая здалёку
Знянацку разам з ветрам —
тут як тут.
І вось ужо ўладарыць навальніца,
Між хмараў раптам
грымнуў гром, зароў,
Ды навальніца хутка праімчыцца,
Як і улада ўсіх уладароў.
У навальніц усіх адно —
Раптоўнасць,
Яны — то тут,
то зноўку не відны.
У іх усё-ткі ёсць
свая чароўнасць,
Горш дождж за навальніцу абкладны.