Расшчодрылася на цяпло прырода —
Натоўп, чарга рупліўцаў-садаводаў.
Распродаж саджанцаў!
Вясна ў правы ўступіла,
Й бабуля тут — яна «дубцы» купіла.
Каб выпесціць такія аднагодкі,
Гады патрэбны — тэрмін не кароткі,
Няпроста іх давесці да парадку,
Сад вырасціць цяжэй, чым немаўлятку.
А тут бабуля, згорбленая крукам,
Цікаўлюся: — Каму купіла, унукам?
— Сабе! Садок мой зацвіце калісьці —
Так хочацца свой яблычак угрызці!
О, святасць чалавечае надзеі!
Не толькі дурань думкай багацее.
І хоць бабулін век пачаў змяркацца,
Дай Бог ёй ураджаю дачакацца.