Хоць я паэт, ды што з таго?
Пытанне гэта без адказу.
Мой верш маўчыць, калі яго
Ніхто не прачытаў ні разу.
О колькі вершаў ёсць «нямых»,
Маўчаць душ нашых абярэгі.
Уклалі талент, сэрца ў іх
Таленавітыя калегі.
У кожнага паэта ёсць
Свой творчы свет, не свет агульны.
Цікавы верш — жаданы госць,
Яму ў душы жывой утульна.
Духоўны, каб агонь не згас,
Як прад аслеплымі кратамі,
Вунь — крамы кніжныя для вас,
Бібліятэк святыя храмы.