Я зусім не такі,
Як пры рэдкіх спатканнях.
А які я? Які?
Без адказу пытанне.
Сёння — сонца прамень,
Заўтра — горыч ад гора.
Зноў які будзе дзень?
Не такі, як учора.
Нашых лёсаў разгад —
Без разгаду спрадвеку.
Невядомага шмат
Для сябе ў чалавеку.
Бралі мы пакрысе
З усіх жніваў насенне.
Ў кожным якасці ўсе
Аж ад светаўтварэння.
Гляну я на бакі,
Ўсё імкнецца змяніцца.
Дык які я? Які?
Й для мяне таямніца.