Я выйду на прасторы Беларусі,
Як вольны сын бацькоўскае зямлі.
Я бачу вас, я вамі ганаруся,
Лясы, азёры, хлебныя палі.
Жыві, мой край, мой кут,
Я з вамі сэрцам тут.
У святы, ў час бяды,
Я з вамі назаўжды.
О край мой родны, ў свеце ты адзіны
Другі не знойдзеш на зямлі такі.
Адвеку тут жывуць жыццём Радзімы
Аддана беларусы-землякі.
Жыві, мой край, мой кут,
Я з вамі сэрцам тут.
У святы, ў час бяды,
Я з вамі назаўжды.
Мой родны край славуты — і не дзіва,
Бо бачыцца і чуецца здаля
Узнёслая Купалава «Малітва»
І Коласава «Новая зямля».
Жыві, мой край, мой кут,
Я з вамі сэрцам тут.
У святы, ў час бяды,
Я з вамі назаўжды.