Жывіце, людзі, на зямлі,
На ёй да нас вякі гулі,
Жыццё нярэдка — драма.
Жывіце, людзі, за сябе
Й за тых, хто паў у барацьбе,
Паў і за вас таксама.
Жывіце, людзі, пасля нас
Узнёсла, светла — ў добры час!
Менш вам трагедый-ценяў!
Жывіце, людзі, ў добры шлях,
Хай кожны крок, як вольны ўзмах,
Нясе вас да здзяйсненняў.
Запомніце, як «Ойча наш» —
Ёсць варыянт: — Жыццю шабаш!
Вы й вашы дасягненні
Пярэйдзеце — у попел, прах,
Праз жар вайны ў чужых мазгах —
Раптоўна, у імгненне.
Ўзмацняйся, чалавечы род,
Жыві заўжды — мільярды год,
Час-вецер б’ецца ў грудзі.
Асвенцымы і Салаўкі,
Дыктатары — прэч, у бакі!
Нясі высока праз вякі
І годна, званне — людзі!