Ў канцы жыцця
жыццё тугой імжыць,
Жывеш —
І ні на што не спадзяешся.
Ў канцы жыцця
вучыцца трэба жыць
Без сэрца,
бо ад болю захлынешся.
Калі жыццё ўсё
на жыцці ляжыць,
Не дапаможа жыць
і святы Ойча.
Ў канцы жыцця
вучыцца трэба жыць
Без памяці,
інакш яна прыконча.
Жыць неабходна —
Што тут варажыць!
Заўсёды будзе з намі
памяць сэрца.
Ў канцы жыцця
вучыцца трэба жыць,
Хоць толькі дзень адзін
І застаецца.