Вам цяжка — узімку і добра — улетку
Ісці па маленстве, вясковыя дзеткі.
Што нам давялося — і сёння вядзецца...
У горадзе дзецям павольней жывецца —
Аўтобус, тралейбус, метро — ад парогу.
Тут школа — ля дому часцей, праз дарогу.
У вёсцы і сёння змянілася мала —
Які табе «Снікерс»?.. Кавалачак сала!
Якія там булкі?.. Скарыначка хлеба!..
А ёсць у вяскоўцаў і ў смачным патрэба.
Дзіцячы вясковы світаначак — кволы,
Складаней за ўсё — дабірацца да школы,
У чорта яна на так званых кулічках,
Ці дождж, ці завея — ідзеш па прывычцы.
Пакуль дабярэшся да школы ад хаты,
Ваўком праглынеш свой абед небагаты.
Хоць з неба каменне, а ўранку — на золку,
Хоцькі-няхоцькі, а джгаеш у школку.