Не ламайцеся ў зачыненыя дзверы —
У пакоі тым ніхто вас не чакае.
Там усмешка не Джаконды, а Сальеры
Іншадумцаў, вальнадумцаў сустракае.
За парогам тым — не пахне беларусам,
Пах угодніцтва пакой запоўніў чадам.
Кожны там адзіным звязаны хаўрусам,
Бо сумленне перакрэсліла пасада.
Не ламайцеся — зачыненыя дзверы!
І не верце красамоўнай шыльдзе — хлусіць!
У пакоі тым — салодка на паперы,
А на справе — вельмі горка Беларусі!