Узнагароджваць
Трэба маладых —
Таленавітых па жыцці,
Рухавых.
Узнагарода
І апошні ўдых
У адзін дзень —
дакор табе, дзяржава.
А ён ішоў да мэтаў
Напралом,
Пакінуў за сабой
гадоў алею.
Ён Гулівер у творчасці,
не гном.
Ах так!
Табе медальку ці дыплом
Чыноўнікі дадуць
Да юбілею.
Ці пакладуць
Запознена ў труну —
Прабач,
У іх нарады і фуршэты.
Пасада
Не залічыць ім віну,
Тым болей, што
Пакінуў свет ты гэты.
Ах, што за чалавек
Быў сярод нас! —
Ва ўсе часы
Кусаюць локці жалю.
А потым і другіх
Праз пэўны час
Жалобна
Наздагон успаміналі,
І у труну
Узнагароды клалі.
Узнагароды
І апошні ўдых —
Чыноўніцтва
І матухна прырода.
Узнагароды...
Хто прыдумаў іх?
Ці ж талент Божы —
Не узнагарода?