Па гараскопу я — блізнец —
Таленавіты, знакаміты,
І жнец, і на дудзе ігрэц,
Вядомы ўсім і п’яна-сыты.
Прароцтваў і прыкмет — букет.
Усё тут — слава і маёмасць.
Ды добра, што з усіх прыкмет
Адна хоць спраўдзіла — вядомасць.
Не, не прыцягваў я штокрок
Натоўп людзей, як стол той шведскі,
А пазнае мяне Пушок,
Сабака, сябар мой суседскі.
Малютка, лепшая з кароў?
Заўжды насустрач мне рыкае.
Каты, сабакі ўсіх двароў —
Па-свойму кожны сустракае.
Такой душэўнай, як мая,
Вядомасці жадаю многім.
І за яе удзячны я
Сваім сябрам чацвераногім.