Мінулае... Вялікае мінулае,
Здаўна з табой знаёмы не агулам я,
А лёсамі вялікімі асобнымі
І незвычайна значнымі асобамі.
Мінулае... Вялікае мінулае,
З табой душа свядомая і чулая.
Высвечваеш памылкі нашы моўныя,
Натхняеш нас на подзвігі духоўныя.
Мінулае... Вялікае, незгаслае,
Трымаеш на сабе жыццё сучаснае.
Ў палоне ты чакання шматгадовага —
Калі народзім мы прарока новага,
Калі нарэшце мы з гнязда уласнага
У свет акрылім песняра сучаснага...
Агульныя развагі — тайнаў сховішча,
Ніводнага не называю прозвішча,
Бо ўсе, як ні лічы, не пералічацца,
Сто назавеш, а застанецца тысяча.
Вядома нам усім сваёй элітнасцю,
Сузор’е наша слынных знакамітасцяў,
Уросшае ў гісторыю карэннямі,
Славутае сваімі дасягненнямі.
Мінулае... Пашаннае, вялікае,
Яно увышыню, наперад клікае,
Яно — арыенціры, вехі значныя,
Яго нашчадкі, мы яму удзячныя.
Як важна, каб яго мы шанавалі
І не заснулі, як на п’едэстале.