Я акраплю Акропаль захапленнем
І выкажу надзею Калізею.
Паспачываю шчыра Нотр-Даму,
Ў Пампеі прынясу пачуццяў гаму.
Душу рассею па усіх святынях,
Па Куліковым полі і Хатыні.
Па Піскароўскіх могілках пакутных,
Па лёсах знаных, чутых і не чутых.
Па усіх мемарыялах Вечнай Славы,
Дапамажы мне ў гэтым, Божа Правы,
Гісторыю мне ахапіць складана
І душаў шмат у ёй закатавана.
Вялікі свет — і гора не малое,
Хачу дапяць да кожнага героя.
Мы помнім іх, няхай ім лёгка спіцца,
Ляці і да жывых, душы крупіца.
Няхай з табой набудзе памяць сілу —
І ахіні маіх бацькоў магілу.