О, не магу стрымаць слязу я,
Слязу замілавання —
Са мной вясна-красна вальсуе
Мелодыю спаткання.
Пяшчота сонца-дабрадзея
Вядзе ў палі, на ўзлескі.
І чуйна сэрца маладзее
Ад погляду пралескі.
Са мной бярозкі карагодзяць
На зайздрасць зграбным клёнам,
Якія з нас вачэй не зводзяць
У вопратцы зялёнай.
Навокал гарманічны, цэльны
Свет мар і іх здзяйсненняў.
І водар адраджэння хмельны,
І стан душы вясенні.