Як мне абрыдлі
Думкі-зачухонцы,
Я прайграю ім —
З імі ў барацьбе.
Здаецца мне,
Што пахаваў я сонца
І заблудзіўся ў цемры —
У сабе.
Я бачу —
Сам сабе я перашкода,
І я сабе жадаю
Ў гэты дзень —
Апошні дзень
Мінаючага года,
Каб тут, у сёння,
Мой застаўся цень.
Каб без яго
Я ў новы год пракрочыў
Праз думак
Расцярэблены гушчар.
Каб жыць пачаў —
Ад навагодняй ночы
Да вечнай ночы
Ў сонечнасці мар.
Мне мала засталося
Й мала трэба —
Хачу я
Напярэдадні зімы,
Каб хлеб надзённы быў,
А ўжо да хлеба,
Каб вершаў
Нараджаліся тамы.
Каб танчылі
Ля елкі карагодам
Любоў,
Надзея,
Вера ў лепшы час.
Я шчыра ўсіх віншую
З Новым Годам
І зычу шчасця
Для сябе і вас!
31.ХІІ.2019