З чым параўнаць непараўнальнае
Жыццё, падоранае нам,
Адзінае і унікальнае?
Тут кожны вырашае сам.
З успышкай асляпляльнай зорнаю?
З самааддачай маяка?
Альбо з навіслай хмарай чорнаю?
Ці з завываннем скразняка?
З пустой пасудзінай нязграбнаю?
Ці з мэтай, над якою німб?
Ці з непаўторнасцю прывабнаю?
Ці з узыходам на Алімп?
А параўноўваюць, як правіла,
Жыццё пасля жыцця заўжды —
Жыццё зняславіла?
Уславіла?
Пустыя? Плённыя гады?..