Народнаму артысту Беларусі
Міхаілу Казінцу
Жыццё — з падзей, людзей, эксперыментаў,
З дабра і зла — і шмат яшчэ з чаго.
Адзін з апошніх ён інтэлігентаў —
Дай Бог жыццю такіх пасля яго.
Бяздарныя ад «я» свайго асіплі,
Заўсёды рэжуць слых іх галасы.
А ён, сапраўдны талент, вельмі сціплы,
Нясе душы узнёсласць праз часы.
Нясе і множыць, з думкай пра нашчадкаў,
І дорыць дасягненні ўсе свае.
Сваё жыццё ён шчодра, без астатку
Духоўнасці высокай аддае.
І вось з такіх асобаў менавіта,
Пакінуўшых адметны творчы след,
Складаецца духоўная эліта
І ўвесь нацыянальны знакаміты,
Між іншых нацый, свой культурны свет.