Залатое вяселле,
Я на ім — «малады».
Адгулі, адляцелі,
Залатыя гады.
Ў вечны вырай умчалі,
У нябыт-ненажэр.
На часовым прычале
Разам з жонкай цяпер.
Тут, ля левага боку,
«Маладая» — і мы
З ёй здалёка-далёку
Шлях прайшлі не прамы.
Нас круціла, ламала,
Быль нуды і бяды,
Але й шчасця нямала
Нам дарылі гады.
А да шчасця ў нагрузку —
Успамінаў алей.
І цяпер на закуску
Залаты юбілей.
Ой вы, госцікі, госці,
Без прынук піце ўсмак.
Шлюбы — гімн маладосці,
Сёння — крыху не так.
Залатое вяселле —
Менш святла, болей цень
Надыходзіць пахмелле
Ад жыцця ў гэты дзень.
«Горка!» — нам аднагодка,
А таму, як наказ,
Лепш крычыце: — Салодка!
Для гасцей і для нас.
22.VII.2017