У тэрмінах заблытаўся я ўшчэнт,
Ішоў да любай колісь «на сустрэчу».
Цяпер гэта завецца «уік-энд»,
Аб гэта слова я язык нявечу.
Зацірку еў, а зараз барбекю,
Магдональдс нейкі, а куды мне дзецца.
Раней браў сала з хлебам у руку,
А сёння гэта сэндвічам завецца.
О слоў замежных непатрэбны бруд,
Не хочацца іх чуць, ды вуха чуе.
Мы гонар свой адсоўваем у кут,
Флэш мок і драйв гучыць то там, то тут,
Ад брэндаў, сэлфі, квэцаў — ванітуе.
Чужыя словы, як вясной зіма,
Тым больш, што наша мова ледзь жывая.
Нацыянальнай годнасці няма
У тых, хто бруд замежны ужывае.