(ад старога)
У вушах яе —
Салавей пяе.
У вушах маіх —
Адспяваў і сціх.
У вачах яе —
Ясна-ранічка
Разгаўляецца, разгараецца.
У маіх вачах —
Дзень прыцьмяніўся,
Надвячорачак затуманіўся.
У душы яе —
Ладзіць баль вясна,
У маёй — даўно
Адгула яна.
Ёй ажно карціць
На гуляначку,
Мне б хаця дайсці
Да ляжаначкі.
Ой жа горка мне —
Падзівіцеся.
З маладзенькімі
Не жаніцеся.
Чым салодкае
Піць з малодкаю.
Лепей церці хрэн
З аднагодкаю.