Няспешна, белакрыла
З’явілася зіма.
Усё пасерабрыла
Ў ахвотку, задарма.
Сумленна і рупліва
Падбельвае вакол.
Ого — якое дзіва
На ёй штодзень камзол!
Убор шыкоўнай дамы
Іскрыцца, зіхаціць,
Ні кропачкі, ні плямы —
Ёсць ад чаго фарсіць.
І завірухай круткай
На галасы пяе.
І ўсё ж адліга хутка
Убор ёй падпсуе.
Але, пакуль іскрыцца,
Не замакрэла даль,
Яна адна — царыца,
Яна спраўляе баль.