Як хутка ўсё мяняецца з гадамі —
Характар, знешнасць, вершы, густы, свет.
Не зразумець — кіруюць змены намі
Ці імі мы? Ці разам — след у след?
Час ставіцца да зменаў без здзіўлення,
Бо сам удзел прымае спраўна ў іх.
І кожнае прыходзіць пакаленне
Другім ад папярэднікаў сваіх.
Час, што віхурыць, не заўсёды генны,
А шмат рэвалюцыйнасці нясе.
Карыснае з сабой прыносяць змены
І горшыцца ўсё ў свеце пакрысе.
Карыснае было і будзе з намі,
У новы час пракладвае свой след.
А горшае, па кроплі нас, як камень,
Падточвае і пагаршае свет.