Была у бабулі курка,
Якая несла ёй яйкі,
Якую бабуля любіла,
А курка ў адказ сакатала.
Быў і каток у бабулі,
Шэранькі верціхвосцік.
Куды б ні ступіла бабуля,
Каток каля ног завіхаўся.
Быў у бабулі і Цява,
Сабака — жывы званочак.
Няхай сабе беспародны,
Затое адданы бабулі.
Былі у бабулі і дзеці,
І нават шматлікія ўнукі,
А век дажывала бабуля
З куркай, катком і Цявам.
Бабуля сабаку — заціркі,
Бабуля катку — сырадою,
Курцы бабуля — зярняткі —
Між імі любоў і згода.
Былі у бабулі курка,
І шэры каток, і сабака,
Між імі — любоў і згода...
Ды раптам не стала бабулі.
І курку спаткала сякера,
Сустрэла катка бездагляднасць,
Бяздомным зрабіўся Цява —
Крыж-накрыж на вокнах дошкі.