Вакол сонца неба сіні глянец,
Вакол нас бадзёрыцца сам час.
Зноў вясна спраўляе белы танец,
Запрашае нас усіх на вальс.
Я кружуся ў вальсе з белым садам
І чаромха кружыцца са мной.
Танчу з маладым пялёсткападам,
У абдымках з дзеўчынай-вясной.
Сціплы бэз вясне глядзіць у вочы —
Весялей — мы ўсе адна сям’я!
Пазяхае, бо не спаў ён ноччу,
Ў захапленні слухаў салаўя.
Баль, шматкалярова, легкакрыла,
Як у фантастычным кружыць сне.
Зноў вясна узнесла, падхапіла,
І панесла над зямлёй мяне.