epub
 
Падключыць
слоўнікі

Сяргей Ясенін

Я спытаў сягоння у мянялы...

Я спытаў сягоння у мянялы,

Што дае за паўтумана на рублю,

Як сказаць мне для цудоўнай Лалы

Па-персідску «Я цябе люблю»?

 

Я спытаў сягоння у мянялы

Ціха, так, як хвалі шапацяць,

Як мне для такой цудоўнай Лалы

Пацалунак ласкавей назваць?

 

І яшчэ спытаў я у мянялы,

Затаіўшы сціпласць удвая,

Як сказаць мне для цудоўнай Лалы,

Як сказаць ёй, што яна мая?

 

Адказаў мяняла мне каротка:

Пра каханне нельга гаварыць, —

Закаханы уздыхне салодка

Так, што погляд яхантам гарыць.

 

Пацалунак назвы ў нас не мае,

Ў пацалунка свой і смак, і пах,

Пацалунак, быццам ружа ў маі,

Растае пялёсткам на губах.

 

Ад кахання не даюць зарукі,

Ведаюць з ім гора і бяду.

«Ты — мая» ёй толькі скажуць рукі,

Што зрывалі чорную чадру.



Пераклад: Сяргей Грахоўскі

Беларуская Палічка: http://knihi.com