epub
 
Падключыць
слоўнікі

Сяргей Ясенін

Над аконцам месяц. Пад аконцам вецер...

Над аконцам месяц. Пад аконцам вецер.

Абляцелы топаль серабрыста свеціць.

 

Дальні плач тальянкі, голас адзінокі —

І такі радзімы, і такі далёкі.

 

Плача і смяецца песня удалая,

Дзе ты, мая ліпа? Ліпа векавая.

 

Я і сам калісьці ў свята сінім ранкам

Да сваёй любімай бег-ішоў з тальянкай.

 

А цяпер ніяк я з мілай не сыдуся.

Пад чужую песню плачу і смяюся.



Пераклад: Юрась Свірка

Беларуская Палічка: http://knihi.com