epub
 
Падключыць
слоўнікі

Сяргей Ясенін

Ні мальбы, ні крыўды, ні дакору...

Ні мальбы, ні крыўды, ні дакору,

Яблыневы дым - мае гады.

Восень згаслым золатам адорыць,

Я не буду болей малады.

 

Сэрцу не шчымець забытым болем,

Халадком яго не наталю.

Басанож блукаць не звабіць болей

Край бярозавага паркалю.

 

Валацуга-дух, займайся шырай,

Вуснаў вогнішча разварушы.

О, мая растрачаная шчырасць,

Шал вачэй і крыгалом душы.

 

Паскупелі ўсе мае жаданні.

Я прысніў цябе, жыццё? Зірні:

Быццам я вясновым гулкім раннем

На ружовым праскакаў кані.

 

Медзь лістоў ласкава льецца з клёнаў,

Нас чакае ў гэтым свеце тло.

У вяках жа будзь ты бласлаўлёна,

Што ўсквітнецца і сканаць прыйшло.



Пераклад: Рыгор Барадулін

Беларуская Палічка: http://knihi.com