epub
 
Падключыць
слоўнікі

Сяргей Ясенін

Выткаўся на возеры ціхі ўзор зары...

Выткаўся на возеры ціхі ўзор зары.

Зноў глушцы са звонамі плачуць у бары.

 

Недзе плача івалга — у дупле ў цішы.

Толькі не да плачу мне — светла на душы.

 

Знаю, выйдзеш вечарам на залом дарог,

Сядзем свежым прыцемкам пад суседні стог.

 

Зацалую дап’яна, вымну кветкаю,

Хмельнаму ад радасці — вецер сведкаю.

 

Ты сама пад ласкамі скінеш шоўк фаты,

Аж да рання п’яную аднясу ў кусты.

 

Хай глушцы са звонамі плачуць у бары,

Ёсць туга вясёлая ў барвасці зары.



Пераклад: Рыгор Барадулін

Беларуская Палічка: http://knihi.com