Нядаўна ў вёсцы Навасёлкі
забіты селькор Рыгор Жлобіч.
З газеты «Звязда» за 1925 год
Кнот у лямпе марна цягне газу,
Папяровы абажур на шкле.
І юнак таропка піша сказы
Пра схаваны кулакамі хлеб...
А з-за плота, дзе галінка бэзу
Пышна распусцілася ў бакі,
У акно нацэлен ствол абрэза —
Смерць рыхтуюць хлопцу кулакі.
Грымнуў стрэл, і куля апаліла
Трапяткое сэрца юнака
У той міг якраз, калі к чарнілу
З ручкай пацягнулася рука.
І застыла, сціснутая грозна.
А шчака прыпала да пісьма,—
Быццам хлопец засядзеўся позна
І над сшыткам проста задрамаў...
А яго апошняя заметка,
Што была падпісана крывёй,
Буйным шрыфтам глянула з газеты,
Заклікала з ворагам на бой.