Гаспадынькі, варам шпарце чаны —
Патужэлі, падужэлі качаны.
Як мароз, рыпяць яны ў руках,
Кожны звонкі, кожны сіверам прапах.
Эх, любата іх будзе шаткаваць!
Дзеці храпкі будуць каштаваць.
Не кажыце, не кажыце,
што ў гародзе пуста,
Паглядзіце, паглядзіце —
вырасла капуста.
На стол ляжа шаткаванка,
як сумёт,
Сыпанецца ў дзежку снегам —
і пад гнёт.
Не кажыце, не кажыце,
што ў гародзе пуста,
Паглядзіце, паглядзіце —
соліцца капуста!