Весялуха, весялуха,
Ці на дождж, ці на суха?
Дзіцячая прымаўка
Не вясёлка — пэўна ж весялуха!
Пад тваёй дугой, крутой, выноснай,
Столькі срэбраных званочкаў
заліваецца...
Ты дачка дажджу і сонца, весялуха,
Хрэсніца сівога перуна
І маланак родная сястра.
Дзецям адкажы —
яны ж пытаюць,
Ці сваё вязьмо развяжа сонца,
Ці шнуркі распусціць дождж ізноў.
Прамаўчала, звонка пакацілася
Весялуха за гарбаты лес...
На пытанне адказала сонца.