epub
 
падключыць
слоўнікі

Тодар Кляшторны

Зазімак

 

Мёрзлы месяц з-за гор васількамі

Перасыпаў азёрную сінь.

Стыне ўсё...

Ледзянымі сярпамі

Выйшла восень рабіну касіць.

 

Тоўпы зор снегавым пералівам

Разматалі ў палях павады.

Быццам коні з намыленай грывай,

У пацёмках застылі сады.

 

Хтосьці там, у шырокім прыволлі,

Дзе узмежкі гараць серабром,

Заспяваў пра шырокае поле,

Засвістаў ледзяным салаўём...

 

Эх, як рвецца душа у прасторы,

Штосьці хочацца вечна кахаць

І дзіцячае радасці зоры

Ў ледзяных перазвонах збіраць.

 

Мёрзлы месяц з-за гор васількамі

Перасыпаў азёрную сінь.

Стыне ўсё...

Ледзянымі сярпамі

Выйшла восень рабіну касіць.

 

[1927]

 


1926

Тэкст падаецца паводле выдання: невядомае
Крыніца: невядомая