epub
 
Падключыць
слоўнікі

Уладзімір Караткевіч

"Блякла-сіняе неба і чырвань галін..."

Блякла-сіняе неба і чырвань галін.

Уздыхае ветрык. Спадае ліст.

Асцярожнае сонца з голых асін

Выпаўзае на ціхі сінічы свіст.

Ледзь хістаюцца ў небе галіны бяроз.

Лёг спакой на іржышчы. Гумённы дым.

Ярам рушыць павольна з дрывамі воз,

І сарока няспынна стракоча над ім.

У разведку за возам ляціць яна,

Трэба край адшукаць, дзе пякуць бліны,

Дзе кайстра, дзе ў ёўні жыве цеплыня,

Дзе заснула сытасць да новай вясны.


1964-1968?

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].-Мн.: Маст. літ., 1987.-431 с., 4 л. іл.
Крыніца: скан

Беларуская Палічка: https://knihi.com