epub
 
Падключыць
слоўнікі

Уладзімір Караткевіч

Энкелад

Багі-забойцы за мужнасць маю

Мне пакаранне знайшлі:

Сіцылію ўсклалі на персць маю,

Этну — на галаву маю,

Морам — ногі мае залілі.

Падушка каменная душыць мне рот,

Я не ў змозе ні жыць ні сканаць.

Я ляжу. Я ляжу. Дзесяць тысяч год.

Я маўчу, нямы і сляпы, як крот,

Але семя мне даў тытанаў народ,

І калі пачынае рыкаць народ,

Бо ідзе за праўду вайна,—

Я ірвуся, ўздымаю скалаў прыгнёт,

І падае ў мора сцяна.

І ўстае да месяца край зямлі,

І пажар ліжа сонца змяёй,

І ў моры варацца караблі

Ад агню любові маёй.


05.11.1964

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].-Мн.: Маст. літ., 1987.-431 с., 4 л. іл.
Крыніца: скан

Беларуская Палічка: https://knihi.com