epub
 
Падключыць
слоўнікі

Уладзімір Караткевіч

"Нават сцюжным зімовым вечарам..."

Нават сцюжным зімовым вечарам

Або увосень, як зліва лье,

Як цябе я на вуліцы стрэчу —

Падгінаюцца ногі мае.

 

Што казаць пра майскае ранне,

Калі ў росах салоўка б’е?

Што скажу я табе, каханы?..

Падгінаюцца ногі мае.

 

Што скажу са сваёй гаротай?

Хаты побач, а...

кроч не кроч,

Будзе тое ж:

салоўка, журбота,

Цыгарэты агеньчык ля плота

І маўчанне ў цёплую ноч.

 

Будзе тое ж:

начныя лукі

Без світання.

Салоўка пяе.

Пакахай жа, вазьмі на рукі —

Падгінаюцца ногі мае.


16.07.1972

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].-Мн.: Маст. літ., 1987.-431 с., 4 л. іл.
Крыніца: скан

Беларуская Палічка: https://knihi.com