epub
 
Падключыць
слоўнікі

Уладзімір Караткевіч

Ноч

Ноч ідзе. Блакітная радасць.

У траве расчыняецца «сон»,

Ля агнёў лугавых, за садам

Раз ад разу гучыць балабон.

Каля вогнішча скачуць коні

І ў глыбокіх, як неба, вачах

Адбіваецца, бы ў палонні

Зачарованы Млечны Шлях.

Цёмны стаў адбівае каліны,

Ледзь даносіцца песня з сяла,

Вечар ласкавы, вечар сіні

Адляцеў, каб ноч надышла.

Баўтане балабон за гаем

І растане зноў ў цішыні.

Мякка вецер галіны качае,

Ціха... Ціха... Пасні... Пасні.

 

[1955 г. ?]


1952-1954?; 10.03.1955

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com