epub
 
Падключыць
слоўнікі

Уладзімір Караткевіч

Паразумеліся

— Яблыкі! Яблыкі! З садоў каралеўскіх.—

— Па чым?

— Усяго тры злотых за меру.

Такая ж славутасць нашага месца,

Як папскі нунцый, як касцёлы і веры.—

— Тры злотых? За гэтую поскудзь? Жарты.

За гэты кізяк, падабраны ў полі? —

— А я вам кажу, што яны таго варты,

Як жанчына сумленная! Як пан добры католік! —

— Памыліліся, пані, я ў бога не веру.

Што мне папа і што мне вера Хрыстова.—

— Ну, калі ўжо справа пайшла на адвертасць,

Дык і я не цнатліўка, а курва з Гжыбова1.

 

[1956 г.?]

1 Гжыбоў — гэта перадмесце Варшавы (заўв. аўтара).


31.05.1956

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com