epub
 
Падключыць
слоўнікі

Уладзімір Караткевіч

Прыганятыя

Не наша воля, не нашы нівы,

Дубы не нашы над рэчкай ціхай.

Чужыя бору сівыя грывы,

Адное наша — сівое ліха,

Адное наша — змрочныя хаты,

Крывёй мужскою зліты палетак,

Адное наша — пазор дзяўчатак,

Адное наша — няволя дзетак.

Не нашы кнігі, мова, палацы,

Затое наша — ўсіх продкаў слава,

Затое наша — наш гонар людскі,

Вагонь у сэрцы, тапор пад лавай.

 

[1954—1957 гг. ?]


1954-1957?

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com