epub
 
Падключыць
слоўнікі

Уладзімір Караткевіч

У жніўны дзень (Жарт)

Ў жніўны дзень на вуліцы бязлюдна.

Нават бэз заснуў каля дзвярэй.

Толькі певень, млявы і марудны,

Кліча частаваць сваіх курэй.

Бабка спіць ля хаты пад кустамі,

І цялё чырвонае усмак

Мокрымі ружовымі губамі

Ёй жуе стракаты андарак.

І старыя, і малыя ў полі,

Суха звоняць конікі ў траве,

І камбайн, як карабель вясёлы,

Паміж жытніх каласоў плыве.

Ну, а вёска цішынёй абнятая.

Толькі й чуць у гэтай цішыні,

Як храпуць у дзвюх суседніх хатах

Жонкі брыгадзіра й старшыні.


1954-1958?

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com