epub
 
Падключыць
слоўнікі

Уладзімір Караткевіч

"Вагеньчык у яблынным садзе..."

Вагеньчык у яблынным садзе

Як вецер дыхне па начах,

Яблыкі частым градам

Са стукам ляцяць на дах.

Тут так прытульна і ціха,

Тут добры такі народ,

Як быццам засталася ліха

За шуламі гэтых варот.

Тут цягне жыць і кахаці,

Тут добра так, як нідзе,

У старасвецкай хаце,

У дзедаўскім родным гняздзе.

Бо з гэтай няяркай зямліцы,

З абрываў рудых, з лугоў,

З садоў у начной расяніцы

Наш корань у свет пайшоў.

Блукаем па свету самі,

Часам звяртаючыся ў сад,

Каб слухаць як начамі

Яблыкі ў дах стучаць.

 

Рагачоў

Ноч

15 чэрвеня 1954 г.


15.06.1954

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com