epub
 
Падключыць
слоўнікі

Уладзімір Караткевіч

Вясна

Раму з трэскам выняла з акенца

І да сіні праціраеш шкло,

Шэрай пыльнай ваты вераценца

Ветрыкам у кветнік аднясло.

 

Кожны, хто праходзіць, азірнецца,

Хоць спяшаў кудысь, як на пажар,

І ў адказ вясною усміхнецца

Мілы-мілы сінявокі твар.

 

Добра ёй спяваць пад небам сінім,

Добра раму у руках трымаць.

Ў сонечным святле стаіць дзяўчына,

Радасная, як вясна сама.

 

1957 г.


1954-1957?

Тэкст падаецца паводле выдання: Караткевіч У. Збор твораў: У 8 т. Т. 1. Вершы, паэмы / [Аўт. прадм. В.Быкаў].- Мн.: Маст. літ., 1987.- 431 с., 4 л. іл.
Крыніца: скан

Беларуская Палічка: https://knihi.com