Як лапаць сярод ботаў
Сярод вядзёр у сенцах
Ганарліва разадзьмуўшы бакі
Стаіць кош
Кош гэта гняздоўе
У якое восенню злятаюцца
Спелыя яблыкі
Кош дзіравы човен
Які кожную зіму
Рамантуюць павукі
Марачы пра падарожжы
Кош ведзьміна калыска
Якая прываблівае да сябе
І палохае
Кош соннае перапляценне змяюк
Якія ў любы момант
Могуць прачнуцца і ўспомніць
Хто яны
І ляжыць кош у сенцах
І спіць у ім чорны кот
Як чорная перліна ў ракавінцы
На дне вясковага жыцця